श्री यमुना चालीसा

॥ दोहा ॥

प्रियसंग क्रीड़ा करत नित, सुखनिधि वेद को सार ।
दरस परस ते पाप मिटे, श्रीकृष्ण प्राण आधार ॥

 

यमुना पावन विमल सुजस, भक्तिसकल रस खानि ।
शेष महेश वदंन करत, महिमा न जाय बखानि ॥

 

पूजित सुरासुर मुकुन्द प्रिया, सेवहि सकल नर-नार ।
प्रकटी मुक्ति हेतु जग, सेवहि उतरहि पार ॥

 

बंदि चरण कर जोरी कहो, सुनियों मातु पुकार ।
भक्ति चरण चित्त देई के, कीजै भव ते पार ॥

 

॥ चौपाई ॥

जै जै जै यमुना महारानी, जय कालिन्दि कृष्ण पटरानी ॥
रूप अनूप शोभा छवि न्यारी, माधव-प्रिया ब्रज शोभा भारी ॥

 

भुवन बसी घोर तप कीन्हा, पूर्ण मनोरथ मुरारी कीन्हा ॥
निज अर्धांगी तुम्ही अपनायों, सावंरो श्याम पति प्रिय पायो ॥

 

रूप अलौकिक अद्भूत ज्योति, नीर रेणू दमकत ज्यूं मोती ॥
सूर्यसुता श्यामल सब अंगा, कोटिचन्द्र ध्युति कान्ति अभंगा ॥

 

आश्रय ब्रजाधिश्वर लीन्हा, गोकुल बसी शुचि भक्तन कीन्हा ॥
कृष्ण नन्द घर गोकुल आयों, चरण वन्दि करि दर्शन पायों ॥

 

सोलह श्रृंगार भुज कंकण सोहे, कोटि काम लाजहि मन मोहें ॥
कृष्णवेश नथ मोती राजत, नुपूर घुंघरू चरण में बाजत ॥

 

मणि माणक मुक्ता छवि नीकी, मोहनी रूप सब उपमा फिकी ॥
मन्द चलहि प्रिय-प्रीतम प्यारी, रीझहि श्याम प्रिय प्रिया निहारी ॥

 

मोहन बस करि हृदय विराजत, बिनु प्रीतम क्षण चैन न पावत ॥
मुरलीधर जब मुरली बजावैं, संग केलि कर आनन्द पावैं ॥

 

मोर हंस कोकिल नित खेलत, जलखग कूजत मृदुबानी बोलत ॥
जा पर कृपा दृष्टि बरसावें, प्रेम को भेद सोई जन पावें ॥

 

नाम यमुना जब मुख पे आवें, सबहि अमगंल देखि टरि जावें ॥
भजे नाम यमुना अमृत रस, रहे सांवरो सदा ताहि बस ॥

 

करूणामयी सकल रसखानि, सुर नर मुनि बंदहि सब ज्ञानी ॥
भूतल प्रकटी अवतार जब लीन्हो, उध्दार सभी भक्तन को किन्हो ॥

 

शेष गिरा श्रुति पार न पावत, योगी जति मुनी ध्यान लगावत ॥
दंड प्रणाम जे आचमन करहि, नासहि अघ भवसिंधु तरहि ॥

 

भाव भक्ति से नीर न्हावें, देव सकल तेहि भाग्य सरावें ॥
करि ब्रज वास निरंतर ध्यावहि, परमानंद परम पद पावहि ॥

 

संत मुनिजन मज्जन करहि, नव भक्तिरस निज उर भरहि ॥
पूजा नेम चरण अनुरागी, होई अनुग्रह दरश बड़भागी ॥

 

दीपदान करि आरती करहि, अन्तर सुख मन निर्मल रहहि ॥
कीरति विशद विनय करी गावत, सिध्दि अलौकिक भक्ति पावत ॥

 

बड़े प्रेम श्रीयमुना पद गावें, मोहन सन्मुख सुनन को आवें ॥
आतुर होय शरणागत आवें, कृपाकरी ताहि बेगि अपनावें ॥

 

ममतामयी सब जानहि मन की, भव पीड़ा हरहि निज जन की ॥
शरण प्रतिपाल प्रिय कुंजेश्वरी, ब्रज उपमा प्रीतम प्राणेश्वरी ॥

 

श्रीजी यमुना कृपा जब होई, ब्रह्म सम्बन्ध जीव को होई ॥
पुष्टिमार्गी नित महिमा गावैं, कृष्ण चरण नित भक्ति दृढावैं ॥

 

नमो नमो श्री यमुने महारानी, नमो नमो श्रीपति पटरानी ॥
नमो नमो यमुने सुख करनी, नमो नमो यमुने दु:ख हरनी ॥

 

नमो कृष्णायैं सकल गुणखानी, श्रीहरिप्रिया निकुंज निवासिनी ॥
करूणामयी अब कृपा कीजैं, फदंकाटी मोहि शरण मे लीजैं ॥

 

जो यमुना चालिसा नित गावैं, कृपा प्रसाद ते सब सुख पावैं ॥
ज्ञान भक्ति धन कीर्ति पावहि, अंत समय श्रीधाम ते जावहि ॥

 

॥ दोहा ॥

भज चरन चित सुख करन, हरन त्रिविध भव त्रास ।
भक्ति पाई आनंद रमन, कृपा दृष्टि ब्रज वास ॥

 

यमुना चालिसा नित नेम ते, पाठ करे मन लाय ।
कृष्ण चरण रति भक्ति दृढ, भव बाधा मिट जाय ॥

 

-----समाप्त-----